திமுக மாவட்டச் செயலாளர்கள் கூட்டம் காணொளி காட்சி வாயிலாக நடைபெறும் என்று, அந்தக் கட்சியின் பொதுச்செயலாளர் துரைமுருகன் அறிவிப்பை வெளியிட்டிருந்தார். அதன்படி, ஜூன் 1-ம் தேதி காலை 11 மணிக்குக் காணொளி வாயிலாக மாவட்டச் செயலாளர்கள் கூட்டம் நடந்து முடிந்திருக்கிறது. திமுக தலைவர் மற்றும் தமிழக முதல்வர் ஸ்டாலின் அறிவுறுத்தலின்படி திமுக-வின் அமைப்புச் செயலாளர் ஆர்.எஸ்.பாரதி, சட்டத்துறை செயலாளர் என்.ஆர்.இளங்கோ ஆகியோரின் தலைமையில் கூட்டம் நடைபெற்றது.
இந்தக் கூட்டத்தில் முதன்மைச் செயலாளர் கே.என்.நேரு, துணைப் பொதுச்செயலாளர் ஐ.பெரியசாமி உள்ளிட்டோர் கலந்துகொண்டனர். இந்த ஆலோசனைக் கூட்டத்தில் மாவட்டச் செயலாளர்கள், வேட்பாளர்கள், முகவர்கள் உள்ளிட்ட பலரும் கலந்துகொண்டனர். இந்தக் கூட்டத்தில் முக்கியமாக வரும் 4-ம் தேதி நடைபெறவுள்ள வாக்கு எண்ணிக்கையில் என்ன செய்யவேண்டும், எப்படிச் செயல்பட வேண்டும் என்பது குறித்து ஆலோசனை மற்றும் பயிற்சி நடைபெற்றது.
